Santurtzik adin guztietarako herritarrentzako jarduerak programatu ditu Gabonetarako

Gabonetarako egun gutxi falta ditugula, Santurtziko Udalak programatu duen jarduera-egitarau berezia eman du aditzera, denetiko ekitaldi eta jardueraz beteta, herritar guztiontzat. Itsazain Ortolatxipi Kultura eta Euskara Arloko zinegotziak prentsaurrekoan azaldu bezala, hilabete eta erdi da egitaraua prestatzen hasi zirela, egitaraua anitza, jarduera ugariduna eta publiko ororentzat. Gainera, jarduerak herriko zenbait tokitan egingo dituzte ahalik eta herritar gehienek har dezaten parte. “Asmoa jarduerak egitea da bai, baina indarrean dauden osasun-neurri guzti-guztiak beteta. Izan ere, egitaraua uneoro egokituko da osasun-egoerara, aforoa mugatuz edo jarduerak bertan behera utziz, osasun-agintariek hala erabakiko balute” adierazi du.

Hurrengo lerrootan Santurtzin datorren barikutik aurrera egingo diren jardueren zerrenda eta nondik norakoak dituzue, atalka banatuta. Esan bezala, barikuan hasiko da ospakizuna, Oparien Eguna izango baita, eta urtarrilaren 6an amaituko da. Hala ere, jardueraren bat edo beste dagoeneko abian da, esate baterako, Santurtziko saltokien erakusleihoen lehiaketa edo arrantza-portuaren inguruan jarritako barrakak. Azken hauek urtarrilaren 19ra arte egongo dira erabilgarri.

Gabonetako Haur Parkeak

Aurreko urteetan bezala, Gabonetan Haur Parkeak jarriko dira umeentzat, bai Kabiezeseko kiroldegian eta bai Mamarigako pilotalekuan. Abenduaren 26an hasi eta urtarrilaren 5era arte egongo dira erabilgarri, 11:30etik 14:00etara eta 17:30etik 20:30era. Urtarrilaren lehenean GHP guztiak itxita egongo dira eta abenduaren 31n eta urtarrilaren 5ean goizez baino ez dira zabalduko.

Gainera, Gernika parkekoan egunero gazteei zuzendutako jarduera ezberdin bat egongo da, baina gazteek eurentzat beren-beregi antolatutako jarduera ugari izango dituzte. Mamarigako Kulturgunean, adibidez, 14 eta 30 urte arteko gazteentzako jarduerak prestatu dira. Abenduaren 27tik urtarrilaren 5era egingo dira, goizeko 11:30etik eguerdiko 14:00etara eta arratsaldeko 17:00etatik iluntzeko 21:00etara, abenduaren 31n izan ezik. Egun horretan goizez baino ez dira egingo eta urtarrilaren 1ean itxita egongo da.

Olentzero eta Errege Magoen bisitaldia

Zugaitza dantza-taldearen eskutik eta Itsasoko Amarekin lankidetzan, Olentzero abenduaren 24an, goizez, Begoñako Ama egoitzara etorriko da bisitan, eta arratsaldeko 18:00etan Santurtzira helduko da itsasoz. Porturatu ostean, Arrantzaleen kofradiara joango da herriko umeei harrera egitera, eta hantxe egongo da 20:30ak arte umeek esan behar diotena entzuten.

Bestalde, Errege Magoak urtarrilaren 5ean etorriko dira 17:00etan, horiek ere itsasoz. Lehorreratu eta gero, herriko giltzak jasoko dituzte alkatearen eskutik. Kabalgata 18:30ean hastekoa da eta ibilbidea Itsasalde, Habana Baporea, Mahastieta, Murrieta, Santa Eulalia eta J.M. Barandiaran kaleetatik eginda, Kabiezeseko errotondaraino igoko dira, berriro jaitsi eta kabalgata udaletxean amaitzeko. Iluntzeko 20:00etan Casa Torre jauregian egongo dira herriko umeak jasotzen. Eguraldi txarra bada, umeei harrera egin egingo zaie, baina aurreko kabalgata ez.

Horrez gain, urtarrilaren 3an, astelehenarekin, 17:30ak eta 21:00ak bitartean Erregeen postariak umeen eskutitzak jasoko ditu Casa Torre jauregian.

Santurtzi kirolak eta Serantes Kultur Aretoa

Kiroletako Udal Institutuak ere zenbait jarduera antolatu ditu Gabonetarako. Abenduaren 24an jolas puzgarriak jarriko dituzte, 18an, berriz, Euskadiko urazpiko tiro-txapelketa egingo da han, eta biharamunean Aketxe Klubak urazpiko jaiotza ezarriko du. Urtea amaitu baino lehen, hilaren 28an, Igeriketaren Eskola Garaikurra eta Federazioaren Garaikurra lehiaketak egingo dira Mikel Trueba kiroldegiko igerileku handian.

Aurreko guztiaz gain, abenduaren 21ean Serantes Kultur Aretoan Musika Eskolaren Gabonetako audizioa egingo da, eta handik bost egunera, hilaren 26an, “Las cuatro estaciones ya no son lo que eran” haur-antzerkia, Vivaldiren musikaz girotua eta komedia-formatuan (sarrera 10 €). Horiez gainera, hilaren 18an “La granja de Zenon” izango dugu SKAn ikusgai. Bi saio egongo dira, bata 16:30ean, bestea, berriz, bestea 19:00etan (sarrera 22 €, bazkideentzat 20 €).

Urtarrilaren 2an Gabonetako Kontzertu Nagusia egingo da 20:30ean (sarrera: 8 €), eta urtarrilaren 4an “La Sirenita” (Sarrera: 16 €, bazkideentzat 14 €). Oraingo honetan ere bi saio eskainiko dira, bata 17:00etan eta bestea 19:00etan.

Jarduera gehiago programatu dira. Besteak beste, Agurtza atunontzian bisita gidatuak egingo dira abenduaren 23, 26 eta 30ean eta urtarrilaren 2, 7, 8 eta 9an, goizeko 11:00etan eta eguerdiko 12:30ean. Santurtzi Itsas Museoan Hasten elkarteak instalatutako jaiotza ikusi ahal izango da egunero, jai-egunetan izan ezik, goizeko 10:00ak eta arratsaldeko 15:00ak bitartean, eta nahi duen orok argazkia ateratzeko aukera izango du Itsasoko Ama arraun-taldeak denboraldi honetan irabazitako bandera guztiak ondoan dituela.

Ostiralean, hilaren 17an, Oparien Eguna egingo dugu Santurtzin. Joan den astean aurkeztutako jarduera horrek merkataritza dinamizatzea du helburu eta, besteak beste, musika eta zozketak eskainiko ditu. Abenduaren 31n kanpai-hotsen ikuskizuna egingo da eguerdiko 12:00etan. Urtero legez Merkatari Batuak elkarteak antolatu du eta DJ Pakok dantzan jarriko ditu han dauden ume guztiak.

“Azken batean herriko hainbat elkartek, kolektibok eta erakundek elkarlanean prestatutako egitaraua da. Eskertzekoa da eurek egindako lana, herriko gazteenek egunotan magia bizi ahal izango dute-eta haiei esker. Kultura ez ezik, ilusioa ere zabaltzea da kontua, nahiz eta ondo asko dakigun neurriak hartu beharko ditugula egitaraua parte-hartzaile guztien osasuna eta segurtasuna zainduz gauzatu ahal izateko .”